1. මම ප්රජාතන්ත්රවාදය යළි ස්ථාපිත කරන අතර සාමය දිනා ගනිමි.
අප ඉදිරියේ ඇති ප්රධාන අභියෝගය වන්නේ ඒකාධිපති පාලනයට පාර කපන විධායක ජනාධිපති ක්රමය අහෝසි කොට ප්රජාතන්ත්රවාදය තහවුරු කිරීමයි. ජනාධිපති ලෙස පත්වීමෙන් අනතුරුව මා සිදුකරන ප්රථම කටයුත්ත වන්නේ, ස්වාධීන කොමිෂන් සභා යළි පිහිටුවීමට ඉඩ සැලසෙන පරිදි ව්යවස්ථාදායක සභාව පත් කොට, 17 වැනි සංශෝධනය පණ ගැන්වීමයි. මම ඉන් ඉක්බිතිව දැනට පවතින යෝධ ඇමැති මණ්ඩලය අහෝසි කරමි. අනතුරුව මාගේ භාරකාර කැබිනට් මණ්ඩලය සඳහා සාමාජිකයන් නම් කරන ලෙස දැනට පාර්ලිමේන්තුව නියෝජනය කරන සියලු පක්ෂවලට ආරාධනා කරමි. ඉන් පසු මම පාර්ලිමේන්තුව විසුරුවා හරිමි. හදිසි අවශ්යතාවක් ලෙස සළකා පවතින හදිසි නීති රෙගුලාසි සංශෝධනය කරමි. මසක් ඇතුළත විධායක ජනාධිපති ක්රමය අහෝසි කිරීමේ පනත හා තොරතුරු දැන ගැනීමේ නිදහස පිළිබඳ පනත සඳහා ද, කැබිනට් පත්රිකා ඉදිරිපත් කරමි. මාගේ භාරකාර කැබිනට් මණ්ඩලය යටතේ ශ්රී ලංකාවේ වඩාත්ම නිදහස් හා සාධාරණ මැතිවරණය පැවැත්වීම සහතික කිරීම පිණිස අවශ්ය කරන ක්රියාමාර්ග මම ගනිමි. මෙම නව පනත් නව පාර්ලිමේන්තුවට මසක් ඇතුළත ඉදිරිපත් කරමි.
විධායක ජනාධිපති ක්රමය අහෝසි කිරීමෙන් පසු ජනතාවට වගකියන ජනාධිපතිවරයා ලෙස පාර්ලිමේන්තුව සමඟ කටයුතු කරමින් මවුබිමටත්, ජනතාවටත් මගෙන් ඉටුවිය යුතු සේවය නොපිරිහෙලා ඉටු කරමි.
2. මම දූෂණය හා නාස්තිය මුලිනුපුටා දමමි.
සති තුනක් ඇතුළත මාගේ භාරකාර කැබිනට් මණ්ඩලය දූෂණයට එරෙහි එක්සත් ජාතීන්ගේ සංවිධානයේ සම්මුතියට අනුකූලව වංචාව සහ දූෂණය පිටුදැකීම සඳහා නව නීති සම්පාදනය කරනු ඇත.
අල්ලස හා දූෂණය සමඟ සටන් කිරීම සඳහා ප්රමාණවත් බලතල ඇති වඩා ශක්තිමත් නව ආයතනයක් පිහිටුවමි. දූෂණයට වරදකරුවන් වූ අයගේ අයථා ලෙස උපයා ගත් දේපොළ රාජසන්තක කරමි. සියලුම මහජන මුදල් විගණනය කිරීම සඳහා ස්වාධීන කොමිෂන් සභාවක් පත් කරමි. ලොව දියුණු ප්රජාතන්ත්රවාදී රටවල පවතින පරිදි පාර්ලිමේන්තු ආචාර ධර්ම පිළිබඳ නීති සම්මත කර ගන්නා මෙන් මම නව පාර්ලිමේන්තුවෙන් ඉල්ලා සිටිමි. මුදල් පිළිබඳ පාර්ලිමේන්තු ආචාර ධර්ම පවත්වා ගෙන යැම සඳහා පාර්ලිමේන්තු ආචාර ධර්ම පිළිබඳ ස්වාධීන කොමසාරිස්වරයකු පත් කරමි. රාජ්ය මූල්ය විගණනය පිළිබඳ ඇති වී තිබෙන බාධා හා දුෂ්කරතා ඉවත් කිරීමට හා විගණන ක්රියාවලිය ශක්තිමත් කිරීමට අවශ්ය නීතිමය හා ප්රායෝගික පියවර ගනිමි. මහජන දේපළ නාස්ති කිරීම වැළැක්වීම සඳහා අවශ්ය කඩිනම් පියවර ගනිමි.
මගේ වත්කම් සහ බැරකම් වාර්ෂිකව මහජනතාවට ඉදිරිපත් කරමි.
3. අතමිට සරුකර ගැනීමට හැම පවුලකටම උපකාර කරමි.
මම රජයේ සේවකයන්ගේ වැටුප රු. 10,000 කින් වැඩි කරන අතර සියලු විශ්රාම වැටුප් විෂමතා ඉවත් කරමි. මම අවම සමෘද්ධි දීමනාව රු. 500 ක් දක්වා වැඩි කරමි. මම දේශපාලන හේතු නිසා සමාජ රැකවරණය අහිමි කර ඇති සියලු පවුල්වලට එය ලබා දෙමි.
මම සමෘද්ධි නියාමකවරුන්ගේ දුක් ගැනවිලිවලට විසඳුම් ලබාදෙමි. මම පෞද්ගලික අංශය සමඟ සාකච්ඡා කොට ඔවුන්ගේ ව්යාපාරවල වියදම අධික කොට ඇති අනවශ්ය බදු හා කප්පම් ඉවත් කිරීම තුළින් පෞද්ගලික අංශයේ සේවකයන්ගේ වැටුප් වැඩි කිරීමට පියවර ගනිමි.
ඇඟලුම් ක්ෂේත්රයේ තුන්ලක්ෂයක් දෙනාගේ
රැකියා රැක ගැනීම පිණිස ජී.එස්.පී. ප්ලස් බදු සහන නැවත ලබා ගැනීම සහතික කරමි. හදිසි කටයුත්තක් සේ සලකා සුළු හා මධ්යම පරිමාණ ව්යාපාරිකයන්ගේ දැවෙන ප්රශ්න විසඳීම සඳහා බලය සහිත කමිටුවක් පත් කරමි.
පොහොර සහනාධාරය යටතේ යූරියා මිටියක් රු. 350 කට ද, අනෙක් පොහොර සඳහා සහනාධාරයද ඇතුළුව විවෘත වෙළෙඳපොළෙන් ලබාදීමට සහතික වෙමි.
හාල් මෝල් මාෆියාව බිඳ දමන බවටත්, වෙළෙඳපොළ මත පදනම් වූ සාධාරණ සහතික මිලක් නියම කරන බවටත් සහතික වෙමි. මම 2010 මහ කන්නයේදී සම්බා වී කිලෝව රු. 40 කට ද, නාඩු කිලෝව රු. 35 කට ද මිලදී ගන්නා බවට සහතික වෙමි. මේ නිසා ගොවියාට ඊටත් වඩා වැඩි මිලක් වෙළෙඳපොළෙන් ලබා ගැනීමට හැකි වනු ඇත. කාබනික කෘෂිකර්මය වර්ධනය කිරීමට ද මාගේ අවධානය යොමු කරමි. කිරි ගොවීන්ට කිරි ලීටරයක් සඳහා ගෙවන අවම මිල රු. 45 ක් දක්වා වැඩි කිරීමට සහතික වෙමි. අලුත් අවුරුද්ද සමයේ භාණ්ඩ හිඟයකින් තොරව දැරිය හැකි මිලකට ලබා ගැනීම සහතික කරමි. සියලුම උත්සව අත්තිකාරම් කලට වේලාවට ගෙවීමට කටයුතු කරමි.
වතු කම්කරුවන්ගේ වැටුප රු. 500 ක් දක්වා වැඩි කිරීමට කෙරෙන සාකච්ඡා ඉදිරියට ගෙන යන අතර ඔවුන්ගේ ජීවන තත්ත්වය නංවාලීමට පියවර ගනිමි. මහ බැංකුවේ අකාර්යක්ෂමතා නිසා විවිධ මූල්යමය වංචාවලට ගොදුරු වූ පවුල්වලට හැකි උපරිම අයුරින් වන්දි ලබා දීමට සහතික වෙමි.
ගොවි විශ්රාම වැටුප වැඩි කරන අතර ධීවරයන් සඳහා නව විශ්රාම වැටුප් ක්රමයක් හඳුන්වා දෙමි. අවිධිමත් රැකියාවන්හි නිරත වී සිටින අයට ඔවුන්ගේ විශ්රාම දිවියේ ආරක්ෂාව සැලසීමට පියවර ගනිමි.
4. මම ජීවන බර සැහැල්ලු කරමි.
අත්යවශ්ය ආහාර ද්රව්ය මත පනවා ඇති අධික බදු කපා හැර ආහාර මිල පහත හෙළීමට වහාම පියවර ගනිමි. මම ඩීසල් හා භූමිතෙල් මත පනවා ඇති සියලු බදු ඉවත් කරමි. ශ්රේෂ්ඨාධිකරණය දුන් තීන්දුව පරිදි පෙට්රල් මිල ද අඩු කරමි.
එල්. පී. ගෑස් සහ අනෙකුත් අත්යවශ්ය භාණ්ඩවලට පනවා ඇති බදු ද සැලකිය යුතු ප්රමාණයකින් අඩු කරමි.
පාසල් ළමුන් ප්රවාහනය කරන වෑන් රථ සහ ත්රිරෝද රථවලට දුම් සහතිකය සඳහා අය කරනු ලබන මුදල ඉවත් කිරීමෙන් සහ පෞද්ගලික බස් රථ හා ත්රිරෝද රථ අමතර කොටස් සඳහා බදු සහන ලබාදීමෙන් ප්රවාහන වියදම අඩු කරමි.
5. මම ජාතික ඒකාග්රතාව ගොඩනගමි.
මම යුද්ධයෙන් පීඩා විඳි සියලුම දෙමළ, මුස්ලිම්, සිංහල වැසියන්ට උපකාර කරමි.
යුද්ධය නිසා පීඩාවට පත් පුද්ගලයන්ට හා ප්රදේශවලට කඩිනම් සහන සලසන වැඩසටහනක් ක්රියාත්මක කරන අතර එමගින් දෙමළ කතා කරන ජනතාවගේ දැවෙන ප්රශ්නවලට ද විසඳුම් ලබා දීමට හැකි වනු ඇත. කඳවුරුවල දැනට ඉතිරිවී ඇති අවතැන් වූවන් වහාම නැවත පදිංචි කරවමි.
නැවත පදිංචිවීම සඳහා පවුලකට දෙන අවම ආධාරය රුපියල් ලක්ෂයක් දක්වා වැඩි කරන අතර. පවුලේ අවශ්යතා ඇගයීමෙන් පසු වැඩිමනත් ආධාර ලබාදීමට කටයුතු කරමි. මම පළමු මාසය තුළ මෙතෙක් යුද්ධය නිසා අවතැන් වූ සියලුම දෙමළ, මුස්ලිම්, සිංහල වැසියන් ලියාපදිංචි කිරීමට පියවර ගන්නා අතර අප්රමාදව ඔවුන් නැවත පදිංචි කරවමි.
ත්රස්තවාදී කටයුතු සම්බන්ධයෙන් අත්අඩංගුවේ තබාගෙන සිටින සියලු දෙනා පිළිබඳ පරීක්ෂණ කඩිනම් කර අධිකරණයට ඉදිරිපත් කිරීම, පුනරුත්ථාපනය කිරීම හෝ නිදහස් කිරීම සිදු කරමි. අපගේ වාර්ගික, ආගමික හා සංස්කෘතික විවිධත්වය මත පදනම් වූ ශ්රී ලාංකික අනන්යතාව මම ප්රවර්ධනය කොට පෝෂණය කරමි. පරිපාලනමය කටයුතු සිදුකර ගැනීමේදී දෙමළ කතා කරන ජනතාව මුහුණ දෙන භාෂාමය ගැටලු කඩිනමින් විසඳීමට පියවර ගනිමි.
ඕනෑම පුද්ගලයකුට කිසිදු බාධාවකින් හෝ මදිපුංචිකමකින් තොරව තම ආගම ඇදහීමට හා වන්දනාමාන කිරීමට තිබිය යුතු නිදහස සහතික කරමි.
6. මම සෞඛ්ය සේවය හා අධ්යාපනය ක්රමවත්ව නගා සිටුවමි.
පළමු මාසය ඇතුළත සෞඛ්ය සේවයේ හදිසි තත්ත්වයක් ප්රකාශයට පත් කොට බාල ඖෂධ ආනයනය නැවැත්වීමට පියවර ගන්නා අතර, උසස් තත්ත්වයේ ඖෂධ රජයේ රෝහල්වලින් ලබා ගැනීමට අවකාශ සලසමි. දැනට ඉවක් බවක් නැතිව පැතිර යන වසංගත රෝග මර්දනය කිරීම සඳහා පියවර ගනිමි. ඖෂධ ගෙන්වීම පිළිබඳ ජාතික ප්රතිපත්තියක් සකස් කිරීමට පියවර ගනිමි.
මම පළමු මාසය ඇතුළත අපගේ අධ්යාපන ක්රමය පිළිබඳ විශ්වාසය යළි තහවුරු කරමි. විශ්වාසනීය විභාග පටිපාටියක් ඇති කිරීමටත්, 2011 පළමු ශ්රේණියට ළමුන් ඇතුළත් කර ගැනීම සඳහා සාධාරණ ක්රමවේදයක් සකස් කිරීමටත් විශේෂ කාර්ය සාධක බළකායන් පත් කරමි. අපගේ ගමේ සහ නගරයේ පාසල්වල පවතින “නගරෙට කිරි ගමට කැකිරි” ප්රතිපත්තිය මුලිනුපුටා දමමි. සියලුම සරසවි සිසුන්ට නේවාසික පහසුකම් ලබා දීම ඇතුළු සරසවි සිසුන්ගේ අවශ්යතා ඉටු කිරීමට පියවර ගනිමි.
7. මම කාන්තා අයිතීන් සුරකින ගෞරවනීය තත්ත්වයක් ඇති කරමි.
මම මාස 2 ක් ඇතුළත කාන්තා අයිතිවාසිකම් පනත ඉදිරිපත් කිරීම සඳහා ක්රියා කරන අතර කාන්තාවන්ගේ ආරක්ෂාව සහ රැකවරණය සඳහා ගත යුතු සෑම පියවරක්ම ගන්නා බවට සහතික වෙමි.
කාන්තාවන් මූලිකත්වය දරන ගෘහ ඒකකවලට උපකාර කිරීම සඳහා සැලසුම් සකස් කිරීමට විශේෂ කාර්ය සාධක බළකායක් පත් කරමි. ණය සැපයීම සඳහා කාන්තා බැංකුවක් ආරම්භ කිරීමට කටයුතු කරමි.
විදෙස්ගත ශ්රී ලාංකික කාන්තාවන්ගේ ආදායම් ප්රවර්ධනය හා ආරක්ෂාව සහතික කරන නව වැඩපිළිවෙළක් ක්රියාවට නඟන අතරම ඔවුන්ගේ පවුල් මුහුණ දී තිබෙන සමාජ ආර්ථික ගැටලු විසඳීම සඳහා සෘජුව මැදිහත් වන කාර්යාංශයක් පිහිටුවමි.
8. මම තරුණ පරපුරට රැකියා ලබා දෙමි.
මාස 3 ක් ඇතුළත “යොවුන් අභියෝගය” වැඩසටහන ආරම්භ කිරීමට පියවර ගනිමි. වයස අවු. 17 – 25 ත් අතර තරුණ තරුණියන්ට ජාතිය වෙනුවෙන් සේවය කිරීමටත්, තම ජීවිතය හැඩ ගස්වා ගැනීමටත් මෙමගින් අවකාශ ලැබේ.
පරිගණක මෘදුකාංග, තොරතුරු සන්නිවේදන තාක්ෂණය, මත පදනම් වූ සේවා සහ ඉංග්රීසි භාෂාව ඇතුළු වෘත්තීය පුහුණුව ලබා ගන්නා අතරතුර රු. 2000 ක මාසික දීමනාවක් ද ඔවුන්ට ගෙවනු ලැබේ. මෙම යෝජනා ක්රමයට දහම් පාසල් ගුරුවරුන් ද ඇතුළත් වේ.
මේ සඳහා ඇතුළත්වීමට කැමැති උපාධිධාරීන් වෙතොත් ඔවුන්ට අමතර රු. 3000 ක දීමනාවක් ගෙවනු ලැබේ. “යොවුන් අභියෝගය” වැඩසටහන සම්පූර්ණ කළ තරුණ තරුණියන් සඳහා රැකියා ලබාදීම පිණිස රජය හා පෞද්ගලික අංශය යටතේ “වැඩ කරන යොවුන් පරපුර” වැඩසටහන ආරම්භ කරමි.
9. මම යුක්තිගරුක සහ විනය ගරුක සමාජයකට අඩිතාලම දමමි.
සාරධර්ම සුරකින සමාජයක් බිහිකිරීම සඳහා මම පෙරමුණ ගනිමි. අධිකරණයේ ස්වාධීනත්වයට එල්ල වී ඇති සියලු බාධක වහාම ඉවත් කිරීමට කටයුතු කරමි. අපක්ෂපාතී ගෞරවනීය පොලිස් සේවයක් මම ස්ථාපිත කරමි. ඔවුන්ගේ සේවයට ඇති කැපවීම අගයන අතර වසර 22 ක සේවා කාලයෙන් පසු විශ්රාම යැමට කැමැති අයට සම්පූර්ණ විශ්රාම වැටුප් සහිතව විශ්රාම යැමට අවසර දෙමි.
ඉහත කරුණු සියල්ල කඩිනමින් ඉටුකරමින් මම විනය ගරුක පුරවැසියන්ගෙන් සමන්විත රටක් තුළ ශිෂ්ඨ සම්පන්න සමාජයක් ගොඩනැගීමේ මූලික පදනම ඇති කරමි.
පාතාල ලෝකයේ මැර කණ්ඩායම් හා අවිගත් කණ්ඩායම් මුලිනුපුටා දැමීමට මම වහාම පියවර ගනිමි. සියලු පැහැර ගෙන යැම් සහ ඝාතන පිළිබඳව පරීක්ෂණ පවත්වා නීතියේ ආධිපත්යය යළි ස්ථාපිත කරමි.
10. මම ජාතික ආරක්ෂාව සුරකිමි.
අසල්වැසි රටවල ආරක්ෂක තත්ත්වය සැලකිල්ලට ගනිමින් 21 වැනි සියවසේ අභියෝගවලට මුහුණ දිය හැකි වන පරිදි අපගේ ආරක්ෂක හමුදා නවීකරණය කරමි.
ආරක්ෂක හමුදාවල සහ සිවිල් ආරක්ෂක බළකායේ සාමාජිකයන් සඳහා ඉහළ මට්ටමේ සුබසාධන ප්රමිතීන් පවත්වා ගෙන යැම සහතික කිරීමට අවශ්ය පියවර ගනිමි. අවාසනාවන්ත ලෙස ආබාධිත වූ ආරක්ෂක හමුදා සාමාජිකයන්ගේ සුබ සාධනය මම සහතික කරමි. රණවිරු සුබසාධනය සඳහා ජනතා ආධාර මත ඇති කළ “අපි වෙනුවෙන් අපි” අරමුදලේ අක්රමවත්, දූෂිත පරිපාලනය ඉවත් කොට කාර්යක්ෂමව මුළුමනින්ම රණවිරු සුබසාධනය සඳහා යොදවමි.
රට වෙනුවෙන් තම ජීවිත පරිත්යාග කළ සියලු දෙනා මම නිරන්තරයෙන් සිහිපත් කරන අතර ඔවුන්ගේ පවුල්වල සුබසාධනය සහතික කරමි.
අප රටේ අවශ්යතා සඳහා ලෝකයේ සියලුම රටවල් සමඟ මිත්ර සබඳතා පවත්වාගෙන යන බවට මම සහතික වෙමි.
